| | 結繩記事時間
星期四體藝Sports Day，
三點九打鐘連Killer都唔玩，
將啲書掉哂入Locker就拉大隊衝去小巴站。
去左樂富等呂圖先，可惜最後都係等唔到。
中途傅SIR打黎話完左，好可惜，
因為自己著緊件今年嘅紅社社衫。
結果直接搭左車去新城市搵傅SIR同帶子食TEA，
大概五點八左右到，
可惜時間太短，吹到七點未到就走。
「你就唔啱啦，咁就離開左我地。」
點名安慰下人先。
帶子咪咁頹啦，正所謂「苟余心其端直兮，雖僻遠之何傷」（我淨係識呢啲咋），
人走左其實影響都唔係好大嘅。
頹落去唔係辦法，提起精神啦！
同左帶子行去禾輋，我覺得夜晚漫步可以好浪漫，但唔係同你喎。
（安慰完你又要串下你，我覺得我好賤格）
搵左間大牌檔，叫埋暐哥（其實應該係叫左暐哥先再搵大牌檔）。
俾人慫恿叫左半打嘉士伯，咁啱啲野食又好遲黎，
咁啱我又好口渴，咁唯有空肚飲。
食食下飯暐哥終於黎，好開心咁吹水，有時我響度諗，
我地係咪真係又咁多野可以講？而事實又真係喎！
然後帶子番宿舍，自己就同左暐哥行番新城市（又黎個夜晚漫步？）
跟住先黎料，一整日嘅折騰之後，極度眼訓，
再加少少酒精影響，個人攰到淒迷。
響新城市漫無目的咁行，諗起有次同Wilson、Kelvin上空中花園吹水（又係吹水……），
就立即上左空中花園。
坐左陣就番屋企，沖涼即訓。
星期五放學又去Sports ground，今次得自己一個，
啲衰運又發作，小巴等勁耐，火車又送車尾……
五點三先到運動場，啲人開始散，
見到部份朋友已經好好，只係同人影左一幅相，
同輝吹左陣水，諗住走果陣突然見到細佬，
又同佢吹左陣水，打左陣交，然後走。
走走下發現自己未見過阿John，所以打左俾佢。
講講下佢突然想將個電話塞俾Kelvin，
話：「唉我都唔知講乜喇，雋熙你聽啦。」笑死我。
最後去左新城市搵佢、Kelvin同Matthew，
又係坐左陣就走。
響火車站撞到輝同Kitty，本來唔想做電燈膽，
但輝咁挽留我我就唯有接受啦哈哈哈。
去到旺角嘅時候先分開，
自己就去左教協幫手搞遊行啲物資。
應承左阿媽番屋企食飯，九點幾就走左，
但番到屋企結果都係冇食到飯。
今日上完Course之後去左序言，
打算參加呢個吹水會：青年論述吹水會－成人帝國主義初探
點知去到發覺好少人，又咁岩見到家榆。
睇左陣書，又忍手唔買（太多書未睇），
結果同佢行左陣。
中途發現原來我地兩個都係響Facebook揀Maybe Attending，
反而出現左，而Attending嘅就冇蒲頭到……
六點未到就番到屋企，然後又開始唔知做乜。
呢一日諗到好多新野，不過冇時候寫低，
睇怕聽日又唔記得一大部份。
夜晚同屋企人食飯，
照舊同細佬吹體藝啲野。
自從細佬中二之後，成日都黎同我講體藝，
一吹就吹好耐。
唔知發乜神經，今日夾埋送嘅羊腩煲，
總共叫左成六碟餸。
結果諗諗下一定食唔哂先Cut番個，
但已經飽到連甜品都唔想食，咁搞法又肥番。
（雖然而家我呢啲叫消瘦，唔係瘦）
最近發覺自己個樣好殘，一起身望住塊鏡，
要問鏡入面果條粉腸係邊個。
我預呢兩年AL生涯應該會殘到淒迷，
可憐嘅係青春又加速離開。
諗番起星期五，真係成個過客咁。
響運動場離開、同John佢地散、見到輝佢地一陣又走、響教協逗留左兩個幾鐘又早走……
所以點解我響上篇Entry突然咁寫。
我真係預計到，總有一日身邊嘅人會變會走，
好悲哀，但真係好大機會係咁。
我唔想咁，真係唔想，大家之間有好多承諾，
可唔可以實踐左佢？
我諗我可以保證自己呢一刻嘅感情，
唔係玩玩下，其實有時候，我可以好認真嘅……
聽日遊行，同埋四子聚會。（好耐冇咁叫過你地，可惜Gary走左）
我究竟做乜而家都未訓？
好問題，我有答案，
唔話你知，點都唔講。
（但又特登挑起條癮，死未）
唔經唔覺寫左咁多字，其實做乜事？
哈哈唔小心押埋韻添。
其實我寫左好耐，唔知有冇成個鐘呢？
亦都好耐冇試過咁樣記事，
真係好似中三果陣咁。
埋尾喇。
你，慢慢走了
像天邊的流星
掀起拍岸的浪花
突然平靜
|
| | Posted 11/8/2009 3:22 AM - 1 View - 0 eProps - 0 comments
- recommend
  - recs0
- share
- email
 - sent0
|
